أمير و نرجس -- الجزء 2

احنا نحكيو و تاليفوني نوقس . 

- الو ؟

- اا امير ، فيصل فيصل . شعمتلي فاك لحكاية 

- هات اعطيني لادراس تو غدوة نشالله يكون عندك 

- ا....@yahoo.fr نعمل عليك ا فرار 

- لعمال على ربي هاي على خير 

علقت و تلهيت بيه لين حليت الكومبت دخلت نلوج على ميساجات سمية . 

قريتهم الكل و بالفعل نلقى تصاورها.. اا معلم ملا بدن علاها ههه فسخت التصور لكل و جيت باش نسكر ريت تصويرت نرجس دخلت نلقاه يحكي معاها 

زعمة نقرا لميساجات ؟ لالا.. تعرش كيفاه ، شق شق ربي يجيب الحق . ما نقراش. سكرت الفايسبوك متع الطفل 

اما عاودت حليتو بالوقت و دخلت نقرا في ميساجاتو هوا و نرجس هههههه نلقاهم يحكيو عندهم برشة و ديما يلعبو في ( action/ verité) لحاصيلو قريت كل شي و عرفت علاها شوية حاجات كيما شتحب و شتكره و اك لحاجات اذوكا..

لمهم رجعت نحكي معا نرجس و كل عادة صبحنا لصباح نحكيو و لحديث ما يوفاش خذيت نومروها باش نكلمها كي نبداو باش نتقابلو . معا حكايت 6 متاع الصباح قتلي تعبت نحب نرقد. انا بطبيعتي وقتها عين مسكرة و عين محلولة دونك قلتلها نرقدو شويا و مبعد تو نجيك فالريكراي كالعادة . مشات رقدت و سكرت انا البيسي و غميت على راسي باش نرقد ما نجمتش.. تخنقت البيت مضبة مالدخان و زاد فما ذبانة كبشت تفنفن في وذني ._. فزيت حليت الشباك والباب و شديت منشفة و طحط نفرفط لين خرجت الذبانة سكرت الباب و جيت باش نتكا شويا انا قاعد نحط فالكيت خاطر منجم نرقد كان بالغناء و الباب دق تفجعت لحظة و بعد فزيت حليت الباب نلقاها امي تفزز فيا ماعادش بكري باش نفطر و نمشي نقرى.. في قلبي قلتلها لاا ولدك قراي .. المهم ما حبيتهاش تحس الي انا عندي جمعة غايب لعبت فاها مفجوع و مزروب خاطر معادش بكري و خرجت.. نمشي و نطلفح فالحومة عرضني العطار عم المنجي قاعد يخرج في دبابز لغاز و شاد ضهرو

- صباح الخير ،هات عليك

- عيش وليدي، والله ضهري لا عاد النجم نستويه مالوجيعة

- شلزك بالاهي علاش تخرج فاهم وحدك ! وينو محمود 

(محمود ولدو كبير و تافه تحكي معاه كلمتين تحس روحك تحكي معا بيكاتشو ._. ) 

- اك لكلب حاشاك بايت يتفرجلي على قصص رعب صبح بايل في سروالو. انيك علاهم و نخدم طول عمري فالخر طلعولي فالصو 

- صباح الخير الصباح هههههه عالأقل هاك صبتو في حاجة هاو يقعدلك فالحانوت و يخدم مالصباح لليل 

- يخدم ؟ ههههه اي تصليش عالنبي ؟ 

- عليه الصلاة والسلام.

- مافماش طفلة ولا مراة دخلت للحانوت و ما يلعبش علاها عينيه يا سيدي لمرة لي فاتت دخلت مرت الصحبي جاركم قضات قضية كبيرة . حسب و قلها 23 دينار ، قتلو ساعدني شوية قلها و كي نساعدك اش تعطيني عملت هكا نحات الخيمار و عاودت لبستو و هوا مركز شاف سدرها قتلو و الله ما سمعتك شقتلي ؟ قلها وريني سدرك مرة اخرى و هزها بلاش 

- هههههههه يطلع منو ولد لحرام ! اييه و وراتو ؟ 

- اصبر او جاييك لحديث ، سمعتو و قعدت مبهمة شوية و هوا ماو ماد راسو يحب يشوف سدرها تعمل هكا تضربو بدبوزة ماء لسقتلو راسو فالبلار و مشات تجري جابت راجلها جا اك الصحبي و جايب في يديه ورقة و يعيط اليلة ذابحك الليلة ناكل لحمك الحاصيلو نحزو فيه بالسيف باش ما يضربوش انا و الجيران و الميبون متخبي ورايا و يعيط اطلبو الحاكم اطلبو الحاكم 

- ههههههههههههه والله يرحم والدين والديك ضحكتني عالصباح ضاهر فيه نهار زاهي . المهم وسع بالك و اكبسو شوية و كان تحب تو نبعثلو ولد مونيرة يهزو معاه كي يجي ماشي للكارتي بالكش كي يجرب يتوب ههه 

- كي يولي راجل . موش نورة امك هاذيكا ؟ ربي يعينها تخدم مالصباح لليل و 

- ابعد ابعد تي هبعد هزبي خنمشي ماعاش بكري 

- ههههه برا مريڤل تو مانقلهاش الي انتي تتهومل ماكش تقرى 

- تقلها نفضحك . اي يحييك 

عطيتها جرية لين تقطع عليا النفس انا وقفت و صبري( ولد حومتي) متعدي بالموتور ماشي يقرى وقف بجنبي و قلي 

- شبيك تقول يجري في جرتك كلب هاو مزال بكري علاش تجري ! 

- ام.. امي ورايا 

- هههه تتهومل كالعادة والله صحة لأمك انا ماشي ساعتين مات توا شباش يعداهم ، اي اطلع اطلع . 

طلعت معاه و قعدنا نحكيو خاطر عندي برشة ما ريتوش نحكيو لين وصلنا هبط و مشا هوا يشكل فالموتور و دخلت انا نعمل في دورة فالكور نعيط لولد كلاسي تعدات بجنبي حاجة تجري ما نعرش شنيا ، بعدها بثانية ضربتني ريحت لبارفان.. ريحة فاوحة و خفيفة شميتها قبل . تلفت نحب نشوف شكون ،، هيا .. نرجس *.* محلاها الفرخة ._. ملي ريتها وليت نتبسم .. نعمل هكا طلبتها طلعت متقراش تفاهامني باش نتقابلو قدام اليسي . خرجت طول بعد ما علقت نلقاها لبرا قاعدة هيا و صحباتها ، و بحكم انا حشام كيما قلتلكم تعديت بجنبها و حسبت روحي ما ريتهاش و تعديت طول نسمع في صاحبتها قالت " تي هاو طلع مزز " تلفت طول لكلهم دورو وجوهم كان هيا وجها حمار قريب يترشق هيا اصلا لفازة نرفزتني و كنت باش نرجع نمرمدها اما كي ريت وجه نرجس.. ترخفت و وحلت في بلاصتي.. ما نعرش علاش اما بلحق ترخفت و وليت نخزرلها كان هيا الي وراها لكل فلوو.. الله اعلم قداش قعدت واقف اكاكة ، كي فقت مالدهشة درت و كملت و قعدت نمشي و نخمم فالي صار.. ملا احساس.. انا سارح و تاليفوني نوقس فيقني مالدوخة

- الو ؟ 

- وي شكون معايا ؟ 

- دور وراك تو تعرف ..

تلفت ورايا نلقا نرجس مهبطا راسها و شادة التاليفون..

- شبيك تعديت حذايا و ما كلمتنيش ؟ 

- حتا انتي بكري تعديت حذايا و مكلمتنيش 

- و قتاه ! تي والله لا ريتك ! 

- نورمال حط X انا متعادلين 

- ههه يا ماسط 

قعدنا نحكيو و جاو اولاد حومة معا بعضهم يدورو من عبد لعبد يعملو فالمشاكل لاعبينها عصابة و قريب يوصلولنا ، نحكي معا نرجس و عينيا مرشوقة فاهم نستنا فاهم باش يوصلو خاطر عارفهم حكاية فارغة تضرب واحد يتفرتو.. اما كي يتبولدو علاها ولا يكفروني قدامها.. تي كي يطلع عندهم لحديد ولا لجاز و ترصيلي متمرمد قدامها.. بديت نخمم باش نقلها تدخل لليساي و نجبد روحي..

درا كيفاه حسيت بحاجة صغيرة و دافية جبدتني من يديا 

تلفت نلقا نرجس شادتلي يديا و دورتني الدورة و وقفت ماغير ما نشعر كي ريتها شدتلي يديا كبستلها علي يداها..

- شبيك شفما ! 

- ولاد حومتي جايين ..

- يعاد شبيه ؟ 

- انور يعرفو خويا و يعاودولو و خويا يفهمها بالغالط ترسيلي فالمشاكل..

- ايي شباش تعمل توا ! 

- اجا نمشيو ورا اليسي لين يمشيو 

- باهي هيا

- انور..

- نعم ؟ 

- يديك..

هبط راسي الوطا نلقا روحي شادلها يدها .. اا معلم مالحشمة سيبتها و جبدت يدي في 0,01 ثانية ..

مشينا ورا اليسي بحذا الديار الي غادي فما دار قدامها شجرة كبيرة قعدنا تحتها و قعدنا نحكيو و شايخين ضحك نحكيو في فازات صارتلنا درا كيفاه سرحت نخمم شبيني مانيش حاشم و قاعد نحكي عادي ؟ شنيا الحكاية ؟ 

- اما هاك طلعت حشام ا سيدي ! ماكنتش نتصورها منك لحقيقة !

- انا حشام ؟ كيفاش ؟ 

- بكري كي جبدت يديك ههه ستنا نوصفلك وجهك. احححححمر قريب تطرشق و دخلت بعضك و ثنية كاملة ما خزرتليش في عنيا جملة .. محلاها لفازة ههه ما فيباليش مزال فما ولاد يحشمو هههه

وقتها انا مت بضحك خاطر بلي حاولت نخبي شي فاقت باها لفازة ، قعدنا نضحكو و نحكيو و انا متكي عالشجرة و هيا قاعدة بجنبي.. درا كيفاه اتكات عليا.. قلبي يدق فال 1000.. قعدت برشة.. اول مرة نحس بشعور كيما هكا.. محبيتش نتحرك باش منفيقهاش و اصلان منجمش نتحرك.. بالرغم عادية اما درا كيفاه.. حسيت الي هيا عندها فيا ثيقة عميا.. فاللحضة هاكي تبدلت نضرتي لنرجس جملة.. منعرش هيا قعدت برشة ولا الوقت وقف بيا .. ضربت السونوري فاقت. افففف ملي كنت نحب السونوري و مستانس نبدا نستنا فاها بالدقيقة و الدرج نهارتها كرهتها ._. فزينا و شيعتها لكلاسها قعدت هيا معا صاحباتها و مشيت انا للولاد قعدت شوية و جاني فيصل يجري .. كتبتلو الباس ولا يبوس و يعنق و يرحملي على خويا تي الحاصيلو قريب يشطح و يعمل هكا يمشي يجيب كسكروتات للولاد لكل في قلبي قلت زعمة كي يفيق بالحقيقة يفكلنا الكاسكروتات ؟ هههه طحت نرحي فاك الكسكروت و هوا يحل في فايسبوكو . تلهيت نحكي معا لولاد و شايخين ضحك علا بنت بروف المات كيفاش تمشي ههه تي دين امها تقول جرانة رجلاها تدحم في بعضها و هيا تطلع و طهبت كالنعامة عادي بروحي اكاكة تلفت نلقا فيصل بارك على ركايبو و يعيط فسختهم..فسختهم.. الجاهلة الي متعرش تكتب الأدراس إمايل تعرف تفسخ الميساجات.. في قلبي قتلو سامحني انتي ما عندكش خوات انا عندي اختي..

مروح معايا يقرق بيا باش نشوفلو كيفاه نرجعلو المياجات و انا نحلف و نعاود الي هوما ما يرجعوش.. ما سيبني الا ما شيحلي ريڤي ._. مروح نزرب جيعان و ما عنديش حتا فرنك نخلط لدار نلقا المسمامة اختي فالكوجينة.. اها اذيا مادامي فالكوجينة مادام هيا الي طيبت الفطور .. ماكلتها اللطف حتي المرضى مي يرضاوش باها اما الله غالب جيعان ماعاش النجم سألتها شنوا الفطور و الفاجعة.. كسكسي .. انا الكسكسي بطبيعتي ما ناكلوش جملة و زاد مطيبتو المرعوشة اختي.. والله كي طعتيني الفلوس لا ناكلو

عملت هكا خرجت مشيت نجري لدار عمي و عيط لولد عمي 

- فاش تعملو

- باش نفطرو اي افطر معانا و مبعد تو نمشيو لدار جدي عمي بكري وصل من فرانسة و ما سلمتش عليه

- مريڤل هيا بطبيعتي جيعان هه

- تي انتي من وقتاه ماكش جيعان هههه اي ادخل

دخلنا لصالة نلقا عمي و ولدو الصغير قاعدين يسبحو الحاصيلو قعدنا بحذاهم و بدا ولد عمي يسبح معاهم .. حسيت روحي من كفار قريش هوما يسبحو قدامي و انا باعثهم و لاهي نڤادي في خيوط سباتي ..

جات مرت عمي و قلتلنا او سايي الفطور حضر وقتها ريڤتي سالت مالجوع ..

جابت بنت عمي الطاولة و بدات تمشي و تجي عالكوجينة..

هاي جابت الماء ، هاي جابت التفاح ، هاي جابت عصير، هاي جابت كيسان ، هاي جابت الماء هاو عمي قلها رجع الماء و جيب دبوزة بارد ، ها النهار لمشوم كرشي باش تنطق بالشر و هوما تقول عاملين بالعاني ! و الله ربي كان مش صبعي تحت الزرسة ممكن راني سبيتهم و هربت ! تعمل هكا مرت عمي تدخل و فيداها شقالة .. شقالة كسكسي.. تو انيك راسي عل الحيط انا ؟ نعمل هكا نلبس صباطي و جيت خارج 

عمي : شبيك وين ماشي ! 

انا : مروح نسيت الكلب ما ربطوش فوق السطح 

عمي : اجا افطر تو تربطو مبعد ! 

انا : لا يا ولدي تو ياكلي لحمامات ! 

خرجت و سكرت الباب تلفت عمي لولدو 

- امير منين جاه الكلب ؟ و من وقتاه يربي فالحمام هوا ! 

- منين نعرف عليه

مشيت لدار جدي و دقيت لباب خرجتلي مماتي طول قلتلها شنوا الفطور قتلي كسكسي  

واععععع ! ملا نهار كلب .. هاي مالا والاهي لاني ماكل انا واقف قدام الباب و تاليفوني نوقس مديتو نلقاه خليل صاحبي 

- الو ؟ 

- اا امير وينك ؟ 

- هاني فالحومة علاه لباس ؟ 

- وخي تعمل عليا مزية اجاني توا 

- تي اخطاني مزلت ما فطرتش 

- ايجا افطر بحذا خوك ! 

- شنوا لفطور ؟ 

- فما الخيرات الكل و كان ما عجبك شي تو ناخذو كسكروتات 

- وخي بعيدة اش باش يهزني فالسخانة 

- يخوذ تكسي سيبني عاد 

- وراسك لا عندي حتا فرنك

- يا سيدي خوذ تكسي تو نخلصها انا 

- مريڤل ، اسمعني عندكم كسكسي ؟ 

- والله البارح بركة كسكسي الله غلب زهرك مشوم 

- اي الحمدولله ، لحضة هاني جاي

- فيسع ما تبطاش

مشيتلو نلقاه قدام الدار خلص التكسي و دخلني لدار نلقا دارهم الكل قاعدين يفطرو فزتلي امو طا منجية تسلم بالبوس و الحملة .. لمراء هاذي من احلا النساء لعرفتهم في حياتي وصلت مدة نخيرها على امي . المرا هاذي بحكم كنت مخالط ولدها برشة تعرف حكايتي الكل خاطر مرة مشيت بت بحذاهم و انا شارب صلبتني على راسي بالخبرة ههه حسبتني واحد من ولادها و تعامل فيا كيفهم بالضبط و تبدا تقرق و تجبهي باش نقعد حذاهم و انا لحقيقة منمشي نطل كان ك يبدا عندي فلوس خاطر منحبش ندخل و يديا فارغة و هوما بالرغم عيلة على قدها اما ما خلاو ماعملو معايا ، بعد ماسألت على كل شي فحياتي كالعادة حطتلي كرسي و قعدت فطرت بعد 5 سنين هروب مالكسكسي فطرنا و فزينا و مشا كل واحد تلها في حاجة و انا و خليل دخلنا لبيتو ركشنا نحكيو و تفكرت علاش جيت 

- حقا شنية لحكاية لقتلي اكيدة ؟ 

- فرمت اك لبيسي الساعة تو نحكيلك 

اسمعني الساعة عندي جارتي مڤلڤتني عندها برشة تحب تبيراتي فايسبوك صاحبها و قتلي خوذ متاعك برجولية بيراتيه راي فدتني 

، في قلب قلت جات في وقتها حتا انا فرنك لا ،

- مريڤل برا عيطلها، 

مشا جابها و جاء جات تفرفط عزحي و تنڤز تقول عمرها 5 سنين ، بيراتيتلها الفيسبووك و جبدها خليل و طلع لبرة و رجعلي مبعد في يديه عشرين الف 

- اي اطلع باهم 

- شنوما ؟

- حاسب رايك ؟ 

- ااا تحب نعطيك ؟ 

- شقولك انتي ؟ 

- ههه امير وراس وخي حاشتي باهم باش نشري اي حاجة لصاحبتي عيد ميلادها غدوة و انا مالقيت باها وين منحبش نقعد فالحشمة

حشمت على روحي و سكت قلت هوا ابجل مني . شويا نهارتها حومتو لكل جاتني باش نبيراتيلهم اك الدار تملا و تفرغ لين امو شعلت لكانون و حطت لبخور هههه حسسوني الي انا مشعوذ ههه في اخر اليل نحسبو فالفلوس منجمناش ضربة ضربتين تطلع الحسلا غالطة دورناها شق شق ربي يجيب الحق و قسمنا كيما جا جا و مشيت من بحذاه و كلعادة تعديت نتهومل لفلوس اصرف اصرف منعرش علاه اما كي تبدا عندي فلوس في جيبي نحسها تعيط " خرجني ! خرجني اوووه خرجنيييي ! " 

اذاكا علاه ديما فالس ههه 

روحت شديت التاليفون و ركشت كالعادة.. نرجس ماهيش كونكتي.. ستنيت ستنيت لين فديت شديت نطلب فاها و هيا لا حياة لمن تنادي مفماش ريحتها جملة.. 

الحاصيلو ليلة كاملة بايت نخزر لسقف و فاد روحي باش تطلع.. الطفلة من كثرة ما ستانست باها وليت ماعاش النجم نرقد ماغير ما نحكي معاها ! زعمة شباها ! زعمة متغشة عليا ؟ شعملتلها ! تطلعش درا شباها.. يا ربي تستر.. منعرش حتا كيفاه رقدت ليلتها..

فزيت و حضرت روحي و مشيت نزرب ركبت فالكار عرضتني مريم.. افففف طفلة قرات معايا كيف كنا صغار تي الحاصيلو اخمج منها ما ريتش و طوول حياتي ما ريتش وحدا تعمل لمكياج كيفها تي مرة لقاوها بايتة فالليسي خاطر لمطر سبت و محبتش تتبل باش ما تتفضحش هههه فالنهار تصوحب زوز مش على حاجة. على بدنها لا اكثر ولا اقل

تعديت بجنبها نزرب باش ما تشوفنيش شدتني

- والله طلع مواتيك الروج ا سيدي ! ما تسلمش ؟ 

- صباح الخير اا صباح.. ابعد مزروب 

- تي شبيه الروج ممروج ! ياخي ماعاش تحب تعبرني ؟

- سامحني وقتاه عبرتك انا من اصلو ؟ 

- تتعلم فالزلعان ؟ اي سكر كشختك لا نفضحك و نطيحلك قدرك 

تلفت نلقا طفلة شادة دبوزة ماء خذيتها و تلفت لمريم 

- اي نشوفو شكون يفضح لاخر ؟ 

وجها حمار و تكونسات و ولات تتنفس بسيف ههههه خليتها و مشيت نلقا شلة قديمة كنت مخالطها ركشة بحذاهم لين وصلنا ، هبط طول مشيت دخلت عملت دورا فاليسي ملقيتش برشا عباد خاطر مزال بكري وليت خرجت و قعدت قدام الباب نستنا في نرجس.. بدات تتعبا بالعباد و بداو لولاد يجيو عاملين حضبة قدامي و انا نڤانس في نرجس درا كيفاه سمعت ضحكتها مديت راسي نلقاها جاية هيا و صاحباتها مشيتلها طول شديتها من يداها و جبدتها

- وينك اا للة ليلة كاملة نستنا فيك مافماش ريحتك ! شبيني نطلب فيك ما تهزش ! معناها مبيتتني مفجوع و تجي الصباح شايخة ضحك ؟ 

- سامحني..

- لا قلي علاش ! عمتلك حاجة ؟ 

- تي لا..

- مالا ! انطق سيبني ! 

- امير سيبني انتي يديا وجعتني..

- سامحني ما قصدتش..