- البارح قصت عليا الكونيكسيون و ملقيتش كيفاه نكلكم و خالتي جات خليت التاليفون فالبيت و خرجت
صهرت معا الدار خاطر متوحشة خالتي عندي برشة ما ريتهاش.. والله لا فقت بيه بالله سامحني
- السماح.. تقرا توا ؟
- لا نقرا ل 10
- مالا اش جيبك !
- تي جيت نلوج عليك اا معلم 54 مرة طلبتني تي ركبتلي الرعب..
- ههههه حط X انا متعادلين
- ههههه
- باهي وين تحب نمشيو ؟
- ياخي ما تقراش ! امير راك البارح بركة سرقت الروجيستر باش تدخل تقرا ياخي باش تعاود تمنك ! تحب تباسي !
- لا روجيستر ولا قراية اخطاني ماعيني في شي اقلب علينا الموضوع ، وين تحب نمشيو ؟
- ما نحب نمشي لحتا بلاصت اصحاب خويا وين تمشي تلقاهم مانحبش المشاكل.. بالله هيا نقعدو ورا اليسي بحذا شجرتنا
- هههه باهي كي تحب لحظة ناخو حاجة ناكلوها خرجت نزرب ما كليت شي..
- يااا ! والله كيفك هههه
مشينا فطرنا و بعد مشينا قعدنا في بلاصطنا و بدينا نهرو كالعادة
- امير في بالك الي انتي اكثر انسان نرتاحلو ؟ بالرغم ما عنديش برشة ملي عرفتك اما نحسك تفهمني عالخر ..
انا تبلوكيت !
- .. شبيك ياخي شعندي قتلك !
- لا شي ! قلت نفس لكلام الي حبيت نقولو من بكري و قاعد نلوج كيفاه باش نقولو !
- هههههه ملا مصيبة ياخي منين طلعتلي !
- الله اعلم هههه
احنا نضحكو و بدينا نقربو لبعظنا بالشوية.. سكتنا الزوز.. قربتلي لين حسيت بنفسها داخل خارج.. غمضة عيناها و انا كيف كيف..
طففف حس متاع حلان باب بالقوي تلفتنا ورانا نلقاو مراء خرجة و في يدها مصلحة
- فزز تڤعد لعنة الله عليكم كان جيتو عباد . تحرك فز من غادي برا روح . تضحك ؟ امك في بالها بنتها تقرا فاليسي مش وراه امشي تحرك والله لا تحشموها.
- يباهي برك فهمنا اسس يزي بلا فضايح وهف
- يراه هازك الوهف ياد لحرام اراح تو نوريك الوهف كيفاش يجي اراح ماك راجل
باب دار اخرى تحل و خرجت مرا تتفرج حشمت علي روحي
شديت نرجس من يداها و درنا الدورة غزرنا في عينين بعضنا و اطرشقنا بالضحك كيخ كيخ لين هيا عيناها دمعت و انا كرشي وجعتني تلفتلها حبيت نتبولد قلتلها علاش تبكي ؟
- نبكي على زهري لمشوم
- علاه شبييك !
- تي لخراا مالقات وقتاه تخرج كان وقتلي انا حبيت ن..
غزرتلي جات العين فالعين تلقاني شبه مصدوم
وجها حمار و هبطت راسها و بدات تفبري
جبدتها من يداها و حملتها.. نعرش علاش اما قلبي في بلاسط يولي يدق بالقوي ولا يدق بشويا و يمشي و ينقس تقول باش ياقف.. اما محلاها.. تتاكل اصل.. اول مرة في حياتي حسيت الي انا حبيت بالحق.. الطفلة هاذي بالذات كي نقعد ما نحكيش معاها ندخل بعظي..
انا معنقها و نسمع في صوت نعرفو..
- احم.. فيسع بدلتني بالمصفارة القزمة ؟ ياخي انا ماعاش نقضي ؟
هزيت راسي نلقاها القحبة مريم تلوك فالوبان و تتمعجن تميل في بدنها ڤحرتلها ڨحرة طول هبطت راسها و ذابت و نرجس دزتني حبت تشوف شكون ماخليتهاش و زدت كبست علاها طول فهمت روحها و رجعت ..
😍
محلاها كي تبدا بين يديا والله حاسسها راقدة ! شعرها طويل و ارطب كل ما نعنقها نقعد نلعب بيه هههه كالعادة فيقتها السونوري.. مشينا عملنا طلة فاليساس و الصدمة كانت انو توا 9h موش 10h بالحق الوقت لنعديوه معا بعضنا تحسو يتعدا بالشوية و بقية النهار خف لف ..
احنا ندورو و يجي واحد صاحبي هوا و صاحبتها
- هاي الحمدوالله عليكم اي مبروك مبروك صحة لاختي والله ماتلقا ماخيرمنو، اي مبروك امشي امير اطلع بالمبروك
- مبروك شنوا يا ولدي فاش تحكي ؟!
- توا هكا تصوحبها اكاكة لا تقلنا وزيد متخلصش المبروك ؟
غزرتلها نلقاها حمارت و باش تطرشق .. ينعن بو زينها
😍
جبتو وحدو
- اانا صوحبتها و انا مبروك دين امك شتجهلني توا ؟
- ياخي ماكش ناوي تڤر ؟ امير راك تبدلت ياسر ! تي شوف وجهك كيفاه احمر هههههه
- اسكت ربك شتفضحني..
- باهي والمبروك ؟
- شبيني ماخو الباك ولا البرمي ؟ اي صلي عالنيبي و ابعدني تكرزنيش.
- والله ما صارها وراس وخي هوما يحكيو انا سمعت جيت نجري لا اكثر ولا اقل خاطر نعرفك ماتحبش ريق التصوحيب و ماهوش جوك اصل.
- يحكيو ؟ اي تعرش كيفاه برا كلم الطفلة قلها راني غلط ولا تصرف و بعد عنا حديث اخر
رجعنا بحذا نرجس و صاحبتها و نستنا في سي الشباب باش يتكلم شي ما باش ينطق درا كيفاش خزرلي يلقاني نڤحرلو فهم روحو و اقترح علاهم باش نركشو في كلاس فارغ و نلعبو اكسيون فيريتي و بالطبيعة ما كناش مالعاكسين ماشين للكلاس و ثنية كاملة و هوا يعمرلي في راسي باش نلحمهالو هوا و صاحبت نرجس يحب يصوحبها ، خلطنا و بدينا نلعبو ، انا و نرجس لحقيقة نلعبو علا نيتنا عادي و هوما يتخوبثو الحاصيلو لحمت بيناتهم بوس و فازات و اك نرجس عيناها باش تطلع و هيا تثبت فاهم كيفاه يبوسو في بعضهم و انا نخزرلها و شاد الضحكة
😂😂
الروندة لبعدها جات فيا انا و صاحبت نرجس و هيا لتحكم
- اي ا سيدي.. بوس نرجس
- اه ؟
خزرت لنرجس نلقا وجها احمر كالعادة اما لمرا هاذي مافهمتش ؟ عندها تبسيمة صغيرة في وجها ههه زعما تستنا فاها ؟ انا لحقيقة منجمش الطفلة ما بيني و بينها شي و زاد قدام لعباد مانحملش و نخاف نطيح من عينها ولا حكاية.. بديت نخمم في سبة باش نتسبب باها و نلزها تبدل الحكم انا اكاكة و تاليفوني نوقس.. كي جبدو و شفتو جاتني فكرت .
- الو ؟ اا شفما ؟ ادي لا يقربلي متخليهمش يدورو فيه ! اني خارج لحضة !
و وقفت و قلتلهم ولد خالتي عامل عركا و جيت خارج تلفتلي لاخر قلي نجي معاك ؟ في مخي قلت كان نخليه لنا يمشيش يعمل مصيبة .. امشي فيسع ازرب روحك .
خرجنا و احنا خارجين تبولدت عالعساس باش مايدخلناش كان رجعنا و مشيت للحماص نشري فالدخان و بعد مشيت نشري في كسكروت
- امير ويني العركة ؟
- انا عركة ؟
- تي هاك قلت واحد يقربلك عامل عركة ؟ شكونو لطلبك ؟
- اااا ! تصدق ماطلبني حد ؟
- تو تتملقط ؟ تاليفونك ماو نوقس ياخي اتلف فيا ؟
- والله شي ! اذيكا آلارم متاع 9:30 عاملها باش كيف نصبح راقد تقومني و كان ماكش مصدق شد شوف وحدك !
الحاصيلو انا نجري و هوا يجري وسط لبلاد لكل خليناه بالجري و هوا مرة يعيط مرة يهز لحجر هههه فالخر فلت منو و روحت مشيت قعدت في بيتي عادي بروحي نتفرج هزني النوم فزيت معا ل11 علا نرجس تطلب فيا
- ويي ؟،
- تي وينك !! لاباس !!
- لاباس شفما شبيك ؟
- انتي لشبيك ! ياخي نورمال في مخك تعمل عركة و تقعد مسكر نهار كامل ! علاه شعمتلك من بكري نبكي و ركبني الهلواس علاه !
- سامحني والله تاعب هزني النوم..
- باهي مش مشكل ، حل الفيسبوك نحكيو
- تي نحب نرجع نرقد..
- امان ؟
- والله تاعب عاللخر نحب نرقد
- باهي امير باهي برا ارقد مرقد نشالله..
- هههه لا لا اصبر هه كلو الا غشك اا قزوم
- ههه منين جبتها هاذي !
- نسيت..
- ملا نسوة عنذك ! تمشيش تنساني انا برك..
- و انا انجم ننساك ؟
- نعرف عليك انا ههه
- باهي باهي علق اني باش نحل
- باه فيسع. نحبك
اه ؟ شقالت !! تقريب قالت نحبك ! زعما تتضومر ؟ لا لا ما تعملهاش..
ياخي اذيكا نيتها تحكي ههههه شو مسهلها ! كان جيت انا راني بقيت نتعصر باش نطقت ! والله احسن ريحتني مالتخمام و التفلسيف..
شنعمل توا.. ستنا الساعة توا برسمي قتلي نحبك !!
حليت الفاسبوك نلاها باعثتلي نححححححبك !. هههههه الليلة ليلة و فراقها الصباح
(لحقيقة البارتي هاذي نسيت اش صار فاها اما نتفكر الي انا نشطح مالفرحة )
قعدنا نحكيو عادي ز معا 00:00 بالضبط
- نرجس بجولية مافماش طفلة عرفتها في حياتي لسقت في مخي قدك .. ملي عرفتك و انا ما نخمم كان فيك نفز الصباح نخمم فيك نجي نرقد فاليل نخمم فيك.. كل ما نحملك منحبش نسيبك.. موش نحبك.. نعشقك.. نعشق كل شي فيك.. ضحكتك.. تبسيمتك.. قصرك.. تفرفيتك.. شعرك.. حشمتك و وجهك كيف يحمار.. نقعد درجين ما نحكيش معاك نتوحشك.. مانعرش علاه ولا كيفاه اما..
- امير..
- شنوا
- اي لحامدوالله عليك كي نطقت ! نزغرط ؟
- اي هههه
- ههه ياخي حقا فهمني علاش الكلهم ديما ملمومين عليك و يحبوك هه ياخي تفرق فالفلوس ؟
- اي ساعات
😂
- ههه تتضومر ؟ تي أنطق
- ههه مشهور مالبيراتاج 😈
- هاي و علاه يحبو فيك نورمالمونت يكرهوك ؟
- الي عندو بيك مصلحة ماينجمش يكرهك.. و زاد باهي معا الناس لكل و مانحقر حد..
- يا ماما يا ماما محلاه حبي المتواضع ههه
- ههه يخليك ا قزوم
😍
- تي سيبنا من قزوم زح هيه قصيرة محسوب ! تي شوف محلاني . واع تصورعا كان جيت طويلة هههه منجمش نتصورها خييييت
- ههههههه
- تمنيك تمنيك .. ستنا الساعة ! فاش قام تعيطلي قصيرة ! على طولك النعناعي
😂
؟
- ادي احشم ههه ! قدر شوا راني نحملك راسك يجي في سدري !
- اي محلاها... فكرتني ! تخر مرة حملتني قلبك مانيش نسمع فيه يدق ههه ! والله نحسابك مت مالول !
- اللطف ._. حشمة حشمة ههه 😛
قعدنا نحكيو ونضحكو لين طلع الصباح هيا مشات تحضر في روحها و انا قاعد في بيتي نتكيف و نخزر لسماء مالشباك و نقول محلاها الدنية.. انا اكاكة و تهد عليا امي الباب قلبي طيحتهولي هادة تقول فرقة مقاومت الارهاب..
- صباح الخير سي الشباب . بايت تهر لصباح مالا ؟
- وين ترا فيه هالخير و انتي شعرفك الي انا نهر !
- و اك اترن ترن ترن متاع المسنجر شنوا ؟ خنفوس ؟ فيقتني مالنوم مرتين . هايه و كيفاش عامل فالدوفوارات مالا ؟
- ترن ترن ترن كيف كيف
😁
- هههه هاي مالا دبر شكون ياخولك بيي اوكا جواب وصل مالادارة السيد عندو شهر الكلاس ماعتبوش ياخي فسرلي وين تمشي تسرح ؟
بون هيا بدا وجها يتقلب و باش تبدا تعيط و انا جاتني الحالة متع العادة
(او باش نفسرهالكم الحالة هاذي نحسها نعمة عطاهالي ربي كل ما نبدا في عركة ولا واحل في مصيبة الوقت يولي يمشي بالشوية و مخي يخدم بزربة تي محسوب الوقت ياقف و نبدا نحكي معا روحي هههه )
قلت توا عندي برشة نمثل فالخر فرشتني الادارة و امي باهية اما تحب شكون يمشي معاها برجلة برا توا نلعبها خايف ولا نبيعها بلفتة ؟ لا هاذي ولا هاذي الزوز ماصطين و باش ترسيلي ناكل فالبخص عالصباح .
- صار توا وصل الجواب !
- شنيا توا وصل ؟ تي سايي ا ما تحلت المشكلة الروجيستر ضاع و كيف عملو روجيستر جديد اخر حاجة لقاوها فالادارة انا امنك دونك حطوني امنك و انا حاضر ! سايي ديجا لبارح مشيت للقيم العام و فهمتو الوضعية و صلحنا الغلطة
- مثبت ؟
- توا هكا ؟ اي برا يرحم امونة حطلي نفطر راك احلا ام فالعالم
- مافماش فطور
- النهار لمشوم اليوم . علاه هكا توا باهي هات نشري حاجة ناكلها !
- ماعنديش !
- علاه ماعندكش ؟ مش مزال كيف صب بابا النفقة الجمعة لفاتت ؟
- وباية ليك وليه . ماني خلصة القرظ و و و..
هنا عرفتها تكذب و ماحبيتش نطول فالكلام خاطر باش تكفرني وليت هزيت روحي و خرجت حتا ريحتي كلها دخان ..
مشيت لليساي و نلقا زوز اولاد مزطلين نعرفهم نعمل هكا ندخلهم لليساي و قعدنا نستناو فالقيم و هوما باركين فالوطا بالضحك الطفلة لتتعدا هاي تشبه لدلاعة ، هاو راسها كي جبل درا شنيا هاي عاملة بارفان موتة . هاي تشبه لجماعة العصر الحجري .. لين جا لقيم تلفتولو قلو يشبه لعصام الشوالي شوف شوف ياخي مش هاذا عصام ! ايجا نتصورو معاه !
- بلحق نشبهلو برشة ؟
- يا ولدي تقول فولة و تقسمت على ثنين ! سبحانو ربي اش خلق و صور ! يا معلم عيني ماتضرك ايجا خويا نبوسك
باسوه الزوز و هوا ملي كان مكرز ولا يتبسم و يسنطر في روحو تقول رئيس دولة و انا شاد الضحكة بالسيف
- تفضلو باش انجم نعاونكم
- ادي ريتها انتا ! باش تعاونا بالرسمي ! شرايك نهزوك تصهر معانا في بواتا ؟ شوية ماكياج تطلع عصام بالضبط اتاو انتي تدخل منة و البنات يهدو عليك اما ماتنساناش و تخلص علينا شربنا !
- زعمة ؟ ياخي مثبت ؟ يطلعوش فالسو ؟
- باش نبيعلك في سلعة انا تقلي فالصو ؟ يا ولدي اخطار الطفلة لتحب علاها و الوكال علينا احنا ! اما علا شرط ؟
- بديناها من توا ؟ ا شنوا ا سيدي ؟
- تي شبيك مكرز انتي ؟ هاي برا نيك يدك فيه موش لازم ايا ا محمد اخطانا منو او طلع ماصط
- يا سيدي والله غلط يا سي محمد بالاهي لا تخليه يمشي ستنا امان !
- باهي يا سيدي سكر كشختك فضحتنا انا قعدنا.
- اشرط الي تحب انا حاضر
- لا تهنا صاحبي رجال ما حاشتناش بفلوسك حبيت نقلك باش كي تمشي معانا ما تتكلمش خاطر صوتك يشبه لسنفور كسول موش لعصام تو احنا نقولولهم الي انتي مريض.
قعد مبهم عندو ڤريماس موش عادي كي ريتو نطرشق انا بالضحك خاطر ماعاش انجم تلفتلي
- تضحك ؟ والله ما نعديك على مجلس التربية
- تعديه على مجلس التربية نعديك على مجلس الكلام الفاحش و الافعال في المضارع فهمت ؟ كان موش هوا راك ماكش باش تبات شايخ اليلة . لازمك تعاملو باحترام و العصا لمن عصا فاهم ؟
- فاهم.. تفضل خويا باش انجم نعاونك ؟
- بيي .
عمل هكا جبد الدفتر متع بطاقات الدخول وبدا يسأل عالاسم و الكلاس و مدلي البيي.
شديتها خزرتلها و درتلو-
ادي سايي راو توا ماعاش انجم ندخل ! عمر وحدة اخرا بالساعة الجاية ولا لا لا اعملها للعشية
- امير ننصحك عمرها بوقت غدوة توا ماسطة و لعشية سخونة برا فك عليك ارجع غدوة
- قالها راجل . تي لالا اخطني لعشية نعدي دفوار و زاد عندي مانعمل غدوة
هذا الكل و القيم يڤحرلنا و عينيه باش تطلع عمل هكا مدلي ورقة كاملة مطتاع بطاقات دخول طبعهم و قلي شد عمر وحدك و تصرف . هزيتها و سلمت عالولاد و خرجت مشيت بعت وحدا بخمسة لاف و مشيت فطرت و فالريكراي دخلت لليساي نلوج على نرجس لقيتها و قعدنا ندورو فالكور و انا شادلها يداها و الزوز حاشمين خاطر وين نتلفتو نلقاو لعباد يخزرولنا ما فهمنا شي..
الحاصيلو بدات الايامات تتعدا و أحنا كل ليلة لصباح و فالنهار كل ساعة تلقانا ندورو فالكور معا بعضنا لين عرفونا لعباد الكل و تعلقنا ببعضنا ياسر
مافماش موضوع ماحكيناش فيه و 24 ساعة نحكيو ما يفرق بيناتنا كان النوم.. كان واحد فينا عندو ساعة ليبر لاخر يمنك باش نتهوملو معا بعضنا .. اما الزح تغير اكثر مالازم..
برشة يا معلم اقل طفلة نحكي معاها تغير منها
و تشريلي مشكلة.. اما نرمال محلاها كي تتغشش هه *-* تتاكل اصل..
كيف اي كوبل وعدنا بعضنا باش ما يفرق بيناتنا كان الموت واك الوغة ههه.. اما عالأقل تحسنا متفاهمين في كل شي.. شخلانا في وسط لكلاس شادين الفايسبوك ولبرا شادين يدين بعضنا ههه الشهر لول تنجم تقول نفحة و الكلام بيناتنا ما يوفاش..
نهار قاعد نحكي معاها فالكلاس و التاليفون طاح شارج و هيا تقرا ساعتين.. منجمش نقعد مانحكيش معاها ساعتين يا زح
قعدت نخمم و بعد خذيت تاليفون ولد كلاسي و قعدت نحكي معاها..
مبعد التاليفون درا شبيه ولا يفلتي وحدو و تسكر رجعتو لطفل و خرجت للركراي و قعدت معا لولاد و بعد دخلت لحصة التربية المدنية ههه بروفا معوضة جايبة ماعندها هههه وقتها نتفكر درس عالهوية ولا حكاية كيما هكا الحاصيلو جات باش تفتتح الدرس عطاتنا وضعية ..
تونسي مشا في رحلة لانقلترا و ضاع على صحابو و ماعندوش فلوس شلازم يعمل ؟
ههههه كلاس كامل جايب ما عندو و يخممو و انا شاد الضحكة باش نموت اصل تلفتلها واحد قلها نمشي نتسول و بعد نطلب دارنا و انا ماعاش انجم سايي طحت نضحك نضحك نضحك لين دموعي هبطت
جاتني قتلي انتي من اول الحصة و انتي باش تموت مضحك اي لم دبشك ! هذا ستر ربي قاعد وحدك
نلم في دبشي و جيت خارج كرشي توجع مالضحك نمشي بالسيف قتلي بالاهي فسرلي ااش يضحك فيك !
- مادام توا واحد مشا لأنقلترا و ضاع فاها . و انتي بفمك قلت تونسي مش ليبي . فسرلي علاه يلوج كيفاه يرجع لتونس ؟! عيبارة واحد دخل لجنة و يلوج علا ثنيا لجهنم يا زح !
خليتها هيا مبهمة و كلاس كامل شايخ ضحك و خرجت
انا راكش بحذا لولاد و جاتني انتيمت نرجس
- ماكش راجل و ماتجيش راجل ملول قلتلها ماتصوحبوش راو يلعب بيك اما ما صدقتنيش ملول نبهت علاها اما بصحتك عديتها علاها يا فرخ نشالله يجي نهار والي عملتو فاها يعملوه في اختك يا ولد لحرام يالي ما تحشمش و جات مشية تلفت للولاد نلقاهم لكل مبهمين فيا ؟ امير شفما ياخي طرشقتها الطفلة ؟ ادي شعندي نطرشق يهديك ابعدني.
خلط علاها نعيطلها حاقرتني جريت و شديتها من يداها
- شبيك تحكي هكا انتي شفما ؟
- شنيا شفما ؟ ملا رقعة فيك والله غريبة فيك ! ابعدني ماتمسنيش يا هامل يالي ما تحشمش !
بدات تعلي في صوتها نهز يديا و نلفها بكف يديا وجعتني اصل و هيا ادهشرت ..
- ريتها ربك تحكي كلمة خارجة الموضوع ما نبدا نكركر فيك من شعرك . انطق توا شفما شصار.
هيا هزت راسها و لولاد لكل خلطو عليا وقفو ورايا قتلي
- هاك تكلم في نرجس و تسب فاها تعمللها يا قحبة و راني صوحبتك باش نلعب بيك لا اكثر ولا اقل و راك عفشة ماجيت شي و بزقة حرام فيك و تسبلها في امها . ياخي فيبالك نرجس ما تحكيليش ؟ ايكا من بكري تبكي قريب تموت في جرتك
- وقتاه هاذا ؟ مثبتا هيا قتلك ؟
قعدت مصدوم مشني فاهم شي.. زعما فيسبوكي تبيراتا ؟ تي شكونو ولد امو الي باش يعملها..
لا لا باز رام تفاهمو عليا.. اي و برا راو تبيراتا علاه يكلمو في نرجس زعمة يعرفوها ؟ تي كيفاه شباش نعمل انا توا ! قاعد نخمم و نرجس تبكي.. لازمني نلقا حل .. زعمة نمشيلها للكلاس .. تي كي تبخصني ولا نعمللها مشكلة.. انا نخمم و درا كيفاه ضربني الضو في راسي تفكرت الي انا خليت فايسبوكي محلول عند اسامة ولد كلاسي هذا واحد ماصط مدوبل و لاعب فاها كلوشار ضامر.. ما فقت كان بنرجس قدامي تبكي خزرتلي و تعدات تجري هيا و صاحباتها.. قلبي ماعاش حاس بيه يدق.. نرجس..نرجس
😰
.. طوول تكبست و ماشي للكلاس و لولاد لكل ورايا قريب 7 ولاد دقيت الباب و دخلت البروفا كيف شافت عرش قريش الي ورايا سكتت و انا كيف شفت اسامة يخزرلي و يكشخ طلعلي الدم لراسي و مشيتلو شديتو و قتلو ايجا نكلمك جيت باش نجبد فيه هبطلي يديا و قلي تلم و افهم قدرك تو باش توليلي رامبو ؟ انا نخزر لدنيا ضلام و نخزرلو كيفاه يكشخ شاد روحي بالسيف تلفتلو واحد مالولاد قلو تفارع فالعاقل او باش يوريك خمجو. و درا شكون دزو من تالي جا باش يطيح عرضتو انا زدت لسقو فالوطا و خرجت نكركر فيه للكور . وقتها ضربت الريكراي و تلمت علينا الناس الكل و لولاد دايرين بينا باش مايدور حد . مالوطا مخليتوش يفز نضرب فيه بغل ماغير ما خليتو حتا يتكلم فمو ولا يسكسك بالدم و سنتو طاحت و ولا درا كيفاه يتكلم يحرز فكوه مني لولاد ولا كنت شنقتل دين امو نخليه كالكلب مطيش غادي نخزلو خنانتو و دموعو و دمو عاملين ككتال و انا كالدايخ كل مرة يجبدني واحد لين سخنت فديت.. في لحضة تفكرت نرجس كيفاه تبكي زدت هبلت و دزيتهم و جيت راجعلو تخبا ورا طفل و عيط والله لاني انا لحكيت معاها.
هنا انا وقفت في بلاصطي مشني فاهم شي ؟
- شنيا ماكش انتي فاش تحكي ؟
- والله ربي ورحمة فطوم الي ماعنديش ما اغلا منها لاني انا لحكيت معا نرجس
- مالا شكون ؟
- لحضة نغسل فمي تو نحكيلك
- انطق ربك لا نڤتل دين امك توا
- باهي باهي باهي ! نور قاعدة بحذايا كي قلتلها الي فايسبوكك محلول خذات التاليفون و قتلي نشيخو عليه شويا و بعد رجعتلي التاليفون والله خاطيني والله
انا زدت تكونسيت و بركت فالقاع ..
- امير نور هاذي مشي اكلي ضاربتو في روحها اكلي قتلك صوحبني و انتي بقيت تتهرب ؟
- اي..
- ملا بنت قحبة !
اي شد كلاسك تحرك امشي تحرك ، شنيا هالحضبة شفما لنا ؟
القيم جا و نخزر لاسامة يستنا فيه وقتاه يوصل قتلو تكلمو كلمة والله و رحمت فطوم مانخلطك علاها اليوم
هبط راسو و مشا يغسل في وجهو فزيت تفرقت لعباد لكل و جيت باش نمشي نلقا اية انتيمت نرجس واقفة في بلاسط العركة
- سمعت للا ؟
- اي.. سامحني
- تي بول عليك. نرجس ويني ؟
- باز راي مزالت فالتوالات ايا نمشيولها تو نفهمها لحكاية و بالله سامحني..
مشيت معاها يديا تقطر بالدم و انا مشني حاس بشي نخمم كان في نرجس .. دخلت اية لتولات و بقيت انا واقف لبرة .. ما نعرش قداه وقت اما برشة .. حاس روحي دايخ و النفس قريب يتقطع عليا.. فقت كان بنرجس خرجت و قعدت تخزرلي شويا و جاتني تجري عنقتني و قاعدة تبكي.. تبكي و انا محملها و ساكت..قعدنا برشة اكاكة ..
-القيم العام- احم .. مافيباليش عنا دار العشاق هوني . يا تباركالله.. ايا اجاو معايا
نرجس تفجعت بعدت و انا ندور في راسي بالسيف خاطر بدا يجيني النوم نرجس معنقتني و تلعبلي بشعري من تالي و انا اذيكا نرقد باها هه تلفتلو قلي صار هوا انتي ! وينك نلوج عليك عندي قداه بالاهي جيبلي نومرو محمد راو النومرو الي عطاهولي مسكر ماني خوك ماتنسانيش و هاني في بيرويا كان كلمك حد اي سلام.
نرجس بقات مصدومة مافهمت شي و انا رجعت نخزرلها و تفكرت كيفاه كانت تبكي قلبي وجعني..
- ياشومي يديك !
- شنوا ؟
- امير يدك كلها دم ياخي ضبحتو الطفل !
- المرة الجاية نذبحو نشالله..
- ايجا لنا اخسل يديك . اية برا جيب بنداج مالإدارة فيسع
انا ماني دايخ مرخوف جملة جبدتني دخلتني لتولات لبنات نسمع كان في ووه شنوا هاذا مهبط راسي لوطا مالحشمة و عيا تغسلي في يديا . تحرق اما انا مش غادي . نخزرلها و سارح.. جابت اية البنداج و عملتهولي نرجس و كبستو و خرجنا بقينا ورا اليساي انا حاط يديا وراها و هيا متكية عليا قعدنا ساعة كاملة كلمة لا قاعدين فالضل نسمعو كان فالعصافر.. ضربت السونوري جيت نكلم فاها طاحت عليا ! راقدة ! انا الي من بكري شاد روحي باش مانرقدش و هيا طلعت تجبد فيه خميري !
😂
راقدة علا رجليا كالملايكة .. عشقتها وليت كل مانخزرلها نسرح و نقعد نتبسم ..
منجمش نتصور من غيرها هيا كيفاه باش النجم نعيش..
كل مانشوفها نرتاح.. نساتني في همي و في مشاكلي معا الدار و قلبتلي حياتي جملة.. نحاتلي الروتين الماصط الي كنت نعيش فيه كل يوم.. ملي كنت ماعنديش حتا امنية فحياتي ولات عندي وحدة.. امنيتي نعيش معاها طول حياتي و ما نفارقهاش.. و حتا كان ما كتبش المكتوب مانحبش نخلاها للكلاب.. انا سارح و تاليفونها نوقس طلبتها صاحبتها الي تروح معاها تلوج علاها فيقتها مالنوم ..
- امير شبيك مافيقتنيش ماعاش بكري !
- مانجمتش..
- ههههههه
- محلاك و انتي راقدة..
- امير..
- آ روحي..
بدات تقربلي و انا منجمتش حتا نتحرك .. خزرتلها في عيناها خدودها حمارو ولات تفتق.. زادت قربت لين ماعادش فما فضا .. قربت لشفايفي.. و بعد باستني من خدي و بعدت..
😡😢
خلاتني متكونسي و طاحت تضحك تضحك لين شافت التبسيما اللي في وجهي سكتت و جات باستني و قتلي نحبك..
نهارتها تنجم تقول حسيت الي انا اسعد انسان فالعالم..
تعداو ايمات باهين وين تتلفت تلقانا معا بعضنا وين تمد راسك للكور تلقانا شادين يدين بعضنا ندورو لين ماعادش فما شكون ما يعرش امير و نرجس فاليساي.. وقتها بدات المشاكل..
مع الوقت كثرت المشاكل ولينا نتعاركوعلى حاجات تافهة و اتفه منها مافماش
حاجات الصغار بيدهم ما يتعاركوش الفروخ ميتعاركوش عليهم اما الزوز عنا صحة راس مش عادية و اذا وصل واحد كبش في حاجة اش باش يسلكها اذكا علاه ديما لحكاية تكبر و ديما توفا بيا انا نقصها و بطبيعتي نفد فيسع اما ديما في اقل من 24 ساعة واحد فيينا يطلب السماح و نرجعو.. باش نكون صادق المدة هاذيكا كثرو عليا البنات و وليت ماعاش لاهي بنرجس جملةهد هاو هاذي كلمتني هاو لخرى حاجتها بيا تي الحاصل حتى برا بيت مش كيفي شعبية كلبة يا بوڨلب لين ساعات نبدا نتسوقط نشري في مشكلة باش نبدل المودباس و نحكي علي راحتي من غير قلق خاطر راسي وجعني من مشاكلها و منعرش درا كيفاه وليت باعثها كي باها كي بلاش معاش نتوحشها كيما قبل و وليت نحكيش معاها برشا ماعاش فاهم روحي نحبها ولا نفحة و طارت .. سايي معناها نرجس اللي كنت نموت عليها فديت منها .. مكرهتهاش اما فديت مالحصرة بعد معديت احلى ايامات معاها فدييت ! ..
Aucun commentaire:
Enregistrer un commentaire